Bu gün səhər saatlarından Bakı Metropolitenində qatarların hərəkətində problemlər yaranıb. Hadisə şahidlərinin ANS PRESS-ə verdikləri məlumata görə, metropoliteninin "Koroğlu”, "Nizami”, "Nərimanov”, "Neftçilər”, "İnşaatçılar”, "Elmlər Akademiyası”, "Memar Əcəmi”, "28 May”, "Sahil”, "20 Yanvar” stansiyalarında sərnişin sıxlığı yaranıb. Qatarların hərəkəti dayanıb. "Nizami” stansiyası ilə "28 May” stansiyası arasında qatar tuneldə 10 dəqiqəyə yaxın dayanıb. İnsan sıxlığı və gərginlik sərnişinlər arasında müəyyən narahatlıq yaradıb. Bakı Metropolitenində qatarlara nəzarət edən dispeçer Muğruz Məmmədovun ANS PRESS-ə verdiyi məlumata görə, qatarların hərəkətində problem yaranmasına səbəb "Nizami” stansiyasından "28 May” stansiyası istiqamətində hərəkətdə olan 32 saylı qatarda texniki nasazlıq yaranıb. Bu səbədən sərnişinlər boşaldılıb və qatar depoya göndərilib. Arada 3-4 dəqiqə gecikmə olub. "Biz yeni iş qrafikinə keçmişik. Lakin yenə sərnişin çoxluğu müşahidə olunur. Sərnişinlər qatarların qapılarını saxlayırlar. Qatarların hərəkətinə mane olurlar. Amma bu gün elə də böyük problem olmayıb. Sadəcə 3-4 dəqiqə ləngimə olub. Sərnişin çox olduğu üçün satansiyalarda sıxlıq müşahidə olunub”, - deyə Muğruz Məmmədov vurğulayıb.
 |
