Kürşad Tüzmən: “Türkiyə Ermənistanla əlaqələri ancaq Qarabağda ay-ulduzlu bayraq dalğalanandan sonra qura bilər”

Türkiyə Azərbaycana sərmayə qoyan ölkələr arasında ilk üçlüyə daxil olur

Bu gün Bakıda Türkiyə və Azərbaycan iş adamlarının iştirakı ilə biznes-forum keçirilib. Biznes forumun açılış mərasimində Türkiyənin xarici ticarət üzrə dövlət naziri Kürşad Tüzmən və Azərbaycanın iqtisadi inkişaf naziri Şahin Mustafayev çıxış ediblər. Açılış mərasimindəki çıxışında iqtisadi inkişaf naziri Şahin Mustafayev ölkəmizin son illərdə əldə etdiyi iqtisadi uğurlardan bəhs edərək bildirib ki, son illər ərzində Azərbaycanda ümumi daxili məhsulun (ÜDM) həcmi 2,7 dəfə, sənaye istehsalı 2,8 dəfə, dovlət büdcəsinin gəlirləri isə 10 dəfə artıb, olkə iqtisadiyyatına yonəldilən investisiyaların həcmi 44 mlrd. ABŞ dollarına, Azərbaycanın valyuta ehtiyatları isə 2,3 dəfə artaraq 18 mlrd. dollara çatıb. Türkiyənin dövlət naziri Kürşad Tüzmən isə öz çıxışında bildirib ki, iki dövlət arasındakı mövcud iqtisadi əlaqələr ən yüksək səviyyədə qurulub. Kürşad Tüzmənin sözlərinə görə, Türkiyə Azərbaycana sərmayə qoyan ölkələr arasında ilk üçlüyə daxil olur. Qeyri neft sektorunda isə Azərbaycana ən çox sərmayə qoyan dövlətin Türkiyə olduğunu deyən Kürşad Tüzmən qeyd etdi ki, istər sərmayə qoyuluşu, istərsə də ticarət əlaqələri bundan sonra da inkişaf etdiriləcək. Türkiyəli nazir, hal-hazırda iki dövlət arasındakı ticarət həcminin 2,3 milyard dollara bərabər olduğunu qed edərək bildirdi ki, bunun 1,3 milyardı Türkiyənin, 1 milyardı isə Azərbaycanın payına düşür və növbəti ildə bu həcmin daha da artacağı gözlənilr. Kürşad Tüzmən bu dəfəki səfərində onu 150-yə yaxın iş adamının müşayət etdiyini söyləyərək bildirdi ki, Azərbaycan onlar üçün vətənlərinin bir parçasıdır. “Biz Azərbaycanı Türkiyədən fərqli görmürük. İstər iqtisadiyyatda, istərsə də digər sahələrdə Türkiyə üçün etdiklərimizi Azərbaycan üçün də edəcəyik”, -deyən Kürşad Tüzmən son zamanlar Türkiyə ilə Ermənistan arasında aparılan danışıqlara da toxunaraq bəyan etdi ki, Türkiyə Ermənistanla əlaqələri ancaq Qarabağda ay-ulduzlu bayraq dalğalanandan sonra qura bilər. Hər iki nazirin açılış çıxışından sonra biznes forum öz işini ayrı-ayrı bölmələr üzrə davam etdirdi.