Bakıda masonluq haqqında kitab çap olundu

Azərbaycan gerçəklərindən bəhs edən Çingiz Abdullayevin yeni detektivi də nəşr olundu!

282: "Kitab Klubu" Azərbaycanda yeni nəşr olunmuş kitabları oxucuların ixtiyarına buraxdı. Bunlar arasında Çingiz Abdullayevin “Payız madriqalı”, Sultan Məmmədovun “Masonluq: Dünyanı idarə edən qüvvə” kitabları da yer alıb.
Milli Məclisinin sabiq üzvü Sultan Məmmədovun bu kitabında gizli fəaliyyət göstərən beynəlxalq mason təşkilatının tarixindən, mahiyyətindən, məqsəd və quruluşundan, bugünkü vəziyyətindən söhbət açılır. Kitaba masonların simvolları, onların təsir agentlərinin şəkilləri və lüğət daxil edilib.

Çingiz Abdullayevin “Payız madriqalı” povesti Azərbaycan gerçəkliyini detektiv janrda əks etdirən əsərlərdən biridir. Təbəssüm Muxtarovanın tərcümə etdiyi əsərdə yazıçı hakim dairələrdə, hüquq-mühafizə orqanlarında, cəmiyyətin bütün təbəqələrində xərçəng xəstəliyi kimi yayılmış korrupsiyanı, mənəvi cılızlığı ifşa edir.

"Kitab Klubu"nun təqdim etdiyi kitablar siyahısında A.Jolin və M.A.Engelqardtın "Böyük adamların təbiəti", A.N.Kononovun "Rusiyada türk dillərinin öyrənilməsi tarixi", A.Talıbzadənin "Şərq teatr tarixi", C.Abdullayevin "Müasir Azərbaycan ədəbiyyatı" əsərləri də yer alıb.