Küsülü qala bilmirəm...
Qayıdıb gəlmişəm yanına yenə, Nə olar, bu dəfə qəlbimə dəymə. Deyəsən gülürsən acizliyimə, Neyləyim, küsülü qala bilmirəm.
Sevənlər həmişə yesir düşübdür, Axı, aramıza nə sirr düşübdür, İradəm sevginə əsir düşübdür. Neyləyim, küsülü qala bilmirəm.
Zaman gözləməyir, ömür-gün axır, Soyuqluğun məni yandırıb-yaxır. Gözüm gözlərinə yalvarıb baxır, Neyləyim, küsülü qala bilmirəm.
Uçub buludlara qona bilərəm. Bu dərdin əlində sola bilərəm. Ömürlük ac-susuz qala bilərəm, Neyləyim, küsülü qala bilmirəm.
Nüsrət Kəsəmənli |