Bakı vaxtı ilə saat 22:00-da Kayseri şəhərindəki “Kadir Has” stadionunda baş tutacaq görüşü slovakiyalı baş hakim Mario Vilk idarə edəcək. Ona həmyerliləri Marian Ruzbarski və Erik Veiss yardımçı olacaq.

Bu, iki ölkə milliləri arasında 5-ci qarşılaşma olacaq. Əvvəlki oyunlardan 3-də Türkiyə yığması qalib gəlib. Yalnız 1 görüş heç-heçə ilə nəticələnib. “Ay-ulduzlular” 4 matçda 6 qol vurub, millimiz isə cəmi 1 dəfə fərqlənə bilib.

Azərbaycan və Türkiyə yığmaları ilk dəfə 1996-cı il aprelin 9-da Tofiq Bəhramov adına Respublika stadionunda yoldaşlıq görüşündə qarşılaşıblar. Həmin matçda Rəhim Zəfərin vurduğu qol sayəsində “ay-ulduzlular” 1:0 hesabı ilə qalib gəliblər. Həmin vaxt Türkiyə yığmasına hazırkı baş məşqçisi Fatih Terim rəhbərlik edib.

Növbəti matç da Bakıda baş tutub və yenə qonaqlar qələbə qazanıb – 1:0. 11 oktyabr 2000-ci ildə keçirilən 2002-ci il dünya çempionatının seçmə qrup matçında baş məşqçi Şenol Günəşin komandasının qələbə topunu Hakan Şükür vurub.

2001-ci il iyunun 2-də İstanbuldakı “İnönü” stadionunda təşkil olunan cavab matçında isə Türkiyə millisi böyük hesabla qalib gəlib – 3:0. Tayfun Korkut, Oktay Dərəlioğlu və Hakan Şükür fərqlənib.

Nəhayət, 12 aprel 2006-cı ildə Respublika stadionunda keçirilən qarşılaşmada yığmamız qələbəni son dəqiqələrdə əldən verib. Rəşad Sadıqovun penaltidən vurduğu qola Hasan Kabze cavab verib – 1:1. Həmin vaxt da “ay-ulduzlular”ın sükanı arxasında Terim durub.

Ümumiyyətlə, Azərbaycan millisi indiyədək 151 oyun keçirib. Onların 25-də qələbə, 38-də heç-heçə, 88-də isə məğlubiyyət qeydə alınıb. 100 qol vuran komandamız 270 top buraxıb. Türkiyə yığması isə 86 illik tarixi ərzində 461 matçda qüvvəsini sınayıb ki, bunların 161-i qələbə, 111-i heç-heçə, 189-u isə məğlubiyyətlə başa çatıb. 592 qol vurub 706 top buraxan “ay-ulduzlular” Kayseri şəhərində ilk dəfə oyun keçirəcəklər. Bu Berti Foqtsun millimizin baş məşqçi postunda 14-cü, Fatih Terimin isə Türkiyə yığmasının sükanı arxasında 86-cı matçı olacaq.

Qeyd edək ki, oyunu izləmək üçün “Azercell”in təşkil etdiyi xüsusi təyyarə reysi ilə Bakıdan 127 azarkeş Kayseri şəhərinə gedib. Görüş məhz bu şirkətin sponsorluğu ilə ANS telekanalı ilə canlı yayımlanacaq. Matçdan sonra millimiz vətənə həmin təyyarə ilə qayıdacaq.

Bu gün daha 2 yoldaşlıq görüşü baş tutacaq. Millimizin 2010-cu il dünya çempionatının seçmə qrup mərhələsindəki rəqibi Almaniya Birləşmiş Ərəb Əmirliklərinin qonağı olacaq, Fransa isə Nigeriyanı qəbul edəcək.