Bakının Nizami rayonu, Qara Qarayev prospektində yerləşən "Ticarət mərkəzi-4” MMC, yəni 8-ci kilometr bazarı kimi tanıdığımız ticarət mərkəzində yanğının baş verməsi burada çalışan insanlara böyük maddi ziyan vurub. Bu səbəbdən sahibkarlar bu səhər Nizami rayon İcra Hakmiyyətinin qarşısına toplaşaraq, dəyən ziyanın ödənilməsini tələb ediblər.
"Bazar yanmayıb. Onu yandırıblar. Millət çörəyini buradan çıxarırdı. İndi bizə dəyən ziyanı ödəyən də yoxdur”, söyləyən şikayətçi Aydın Abbasov 10 minə yaxın ziyana düşdüyünü bildirib.
Nizami rayon Polis İdərəsinin rəisi İsmayıl Əsədov bazarın hansı səbəblərdən yanmasının araşdırmalardan sonra məlum olcağının bildirib: "Hazırda araşdırma aparılır. Hadisənin səbəbi ancaq istintaqdan sonra məlum oldacaq”.
İcra hakmiyyəti başçısının müavini İldırım Mehdiyev ANS-ə açıqlamasında bazarın həmişə qalmaqallı olduğunu bildirib. Belə ki, bazar 2000-ci ilə qədər özəl mülkiyyətdə olsa da, indi Açıq Səhmdar Cəmiyyət kimi fəaliyyət göstərir. Hazırda mülkiyyətlə bağlı iş məhkəmədədir. Onun sözlərinə görə, bazar yenidən bərpa olunacaq və əvvəlki ticarət obyektləri sahibkarlara veriləcək.
"Biz bir qədər əvvəl camaatla da görüşdük. Onlara söz verildi ki, iki ay müddətində bazar hissə-hissə tikiləcək. Satıcılar öz yerlərinə qayıdacaq”, - deyə İldırım Mehdiyev qeyd edib.
O ki qaldı dəyən ziyanın ödənilməsinə, İldırım müəllim bildirdi ki, sahibkarların sığortası olmadığı üçün, onlara kompensaysi verilməsi bir qədər müşküldür.
Qeyd edək ki, 8-ci kilometr bazarı Əmlak Məsələləri Dövlət Komitəsinin balansındadır. Bu üzdən zərərçəkmişlər Nizami rayon İcra Hakimiyyətindən sonra Komitənin binası qarşısında etiraz aksiyası keçiriblər. Əraziyə Xətai rayon Polis İdarəsinin Post Partrul Xidmətinin əməkdaşları cəlb olunub. Etirazçılarla Komitə rəsmiləri arasında danışıqlar aparılıb. Lakin konkret nəticə açıqlanmayıb.
Məsələ ilə bağlı Əmlak Məsələləri Dövlət Komitəsinin mətbuat xidmətinin rəhbəri Qulu Xəlilov ANS-ə bildirib ki, araşdırmalar aparılır. Onun sözlərinə görə, araşdırmalardan sonra konkret söz demək mümkün olacaq.
Qeyd edək ki, bu gecə Nizami rayonu ərazisində yerləşən və 8-ci kilometr bazarı kimi tanınan ticarət mərkəzində yanğın baş verib. Bazarın 4, 5 hektar ərazisi yanaraq külə dönüb.
|