Şəriət qanunları ilə idarə olunan Yəmən azyaşlı gəlinləri ilə məşhurdur. Nojud Əli isə bəlkə də bu ölkənin ən şanslı azyaşlı gəlinidir. Çünki o, ailəsi tərəfindən zorla ərə verildikdən sonra başına gələnlərdən təsirlənən bir vəkilin amansız mübarizəsi nəticəsində boşana bilib və yenidən uşaqlığına qayıtmaq imkanı qazanıb.

Yəməndə nikah yaşı 15 olsa da, ailəsinin razılığı ilə qızların daha az yaşlarında da ərə verilməsi mümkündür.

8 yaşında ərindən boşanma savaşını qazanan Nojud Əli inanılmaz həyat hekayətini kitab şəklinə salıb.

Hazırda 10 yaşında olan Nojud Əlinin öz həyatını anlatdığı kitabın bütün dünyada ən çox satılan kitablardan biri olacağı gözlənilir.

Balaca Nojud Əli kitabında ailəsi tərəfindən zorla 28 yaşında bir adama ərə verilməsini və sonradan bir vəkilin köməyi ilə boşanmasını nəql edir.

8 yaşındaykən boşandıqdan sonra özü ilə eyni durumda olan rəfiqələri ilə bərabər boşanma tortunu da kəsmişdi.