"Günə baxan” verilişinin canlı yayımında nişanlanan kimsəsiz gənclər aprelin 10-da evləniblər. Ötən şənbə "Ümid Yeri" Sığınacaq Evinin sakinləri Fəyyaz Səlimqəliyevlə Leyla Həsənovanın toyu olub. ANS TV-nin "Günə baxan” proqramının təşəbbüsü ilə baş tutmuş toy mərasimi "Movida Plaza” Sadlıq Sarayında düzənlənib. Restoranın rəhbərliyi bu toyu gənclərə hədiyyə edib. Qeyd edək ki, toya minə yaxın adam gəlmişdi. Gələn qonaqların bir hissəsi toya pul salırdı, digərləri isə zinət əşyaları və cehizlik əşyaları hədiyyə edirdi.
Kimsəsiz gənclərin toyuna təhsil naziri Misir Mərdanov və millət vəkilləri Gülər Əhmədova, Gültəkin Hacıyeva, Qənirə Paşayeva ,1 saylı Doğum Evinin baş həkimi Stella xanım və digər şəxslər təşrif buyurmuşdu. Gözlənilməyən qonaq isə amerikalı Cin Veynqartner oldu. TEA Təhsil Əməkdaşlıq proqramı üzrə Təhsil Nazirliyinin xətti ilə Alyaska ştatından Azərbaycana gəlmiş nümayəndə Fəyyazla Leylaya yataq dəsti hədiyyə gətirmişdi. Amerikalı qonaq ANS PRESS-ə açıqlamasında bildirib ki, ölkəmizdə olduğu müddətdə Fəyyazla Leylanın toyu onun iştirak etdiyi ilk milli toy mərasimi olub.
Gənclərin toyunun musiqili qonaqları aşıq Əhliman Şirvanlı, xalq artistləri Nisə Qasımova, Məleykə Əsədova, əməkdar artist Elza Seyidcahan, skripka ifaçısı Səlim Abbasov, klarnet ifaçısı Zahid Qubadlı, rəqqasə Fatimə, müğənnilər Almaz Orucova (qızlardan ibarət "Azərbaycan inciləri” ansamblı ilə), Roza Zərgərli, Yaqut Babayeva, Aslan Hüseynov, Neman Həsənov, aşıq Oktay Eloğlu və digərləri olub. Toyu "Toylar Kralı” layihəsinin iştirakçısı Əşrəg Zəngəzurlu öz ansamblı ilə idarə edirdi. Toppuş bacı (Tünzalə Ağayeva) həmkarı Natiq Fərzəliyevlə həm aşı gətirdilər, həm də gənclərin xınayaxdı mərasimini keçirdilər.
Fəyyaz və Leylanın toyunda ən az onlar qədər sevinən "Ümid Yeri” Sığınacaq Evinin uşaqları idi. Toyda Sığınacaq Evinin 40 sakini iştirak edirdi. Bu uşaqlar tez-tez bizə yaxınlaşıb hansı tanınmış müğənnilərin gələcəyini xəbər alırdılar. Bu kimsəsiz uşaqların ən çox gözlədiyi və soruşduqları müğənni Röya idi. Lakin toyda populyar müğənnilərdən çox populyar olmayanlar müğənnilər gəlmişdi.
P.S. Toyun əvvəlindən axırınadək qapıda dayanıb qonaqları qarşılayan Turan İbrahimov sanki bəyin atasını əvəz edirdi. "Heç atam mənim toyumda bu əziyyəti çəkməmişdi", - deyə gülərək söyləyən Turan bu xeyriyyə işini "Günə baxan" proqramı olaraq Allah rizası üçün etdiklərini bildirib.
|
Məhəmmədəli
sensizlik
Leyla.
Ilqar
SeCReT
