Rusiyanın paytaxtı Moskvada azərbaycanılarla ruslar arasında kütləvi dava olub.  ANS PRESS-in «Rosbalt» saytına istinadən verdiyi məlumata görə, Davıdkovski küçəsində baş verən davada 80 nəfərə yaxın adam iştirak edib. Hadisə barədə milisə məlumatı yerli əhali verib. Dava iştirakçılarının çoxu qaçaraq milisdən yayınıb. Yalnız 11 nəfəri saxlamaq mümkün olub ki, bunlardan 7-i Azərbaycan, 4-ü Rusiya vətəndaşıdır.
Saxlanılan Rusiya vətəndaşları izahatlarında bildiriblər ki, onlar hadisə yerinə internetdə tanış olduqları Nastya adlı qızın ad günündə iştirak etmək üçün gəliblər. Toplaşan gənclər pivə içməyə başlayıblar. Sonra onların yanına 15 qafqazlıdan ibarət qrup gəlib və onları təhqir edib. Nəticədə dava düşüb.
Lakin milis davanın əvvəlcədən planlaşdırıldığını və milli zəmində baş verdiyini güman edir. /ANS PRESS/