Ermənistan ordusunun əsgəri Simonyan Paryur Gerasimoviç Ermənistana qayıtmaqdan imtina edib. Əsgər Ermənistan vətəndaşlığından imtina etməsi və Azərbaycan vətəndaşlığına qəbul edilməsi xahişi ilə hakimiyyət orqanlarına müraciət edib. Bu barədə Turan agentliyi məlumat yayıb.

Mənbənin məlumatına görə, əsgər Ermənistan ordusunun Qarabağdakı hərbi hissələrinin birində qulluq edib və Ermənistan ordusundakı rüşvətxorluğa, işgəncələrə etiraz olaraq 2008-ci ilin mayında könüllü Azərbaycan tərəfinə keçib. “Əsgər Paryur Simonyan qabaqcadan komandirlərinə rüşvət vəd verib və məzuniyyətə buraxılıb. Məzuniyyətdən sonra vəd etdiyi məbləği verə bilmədiyinə görə, ona hər gün işgəncə verilib, yuxusuz saxlanıb. Gündə bir neçə dəfə döyülən əsgər dözməyərək Azərbaycan tərəfinə keçib. Yalnız Azərbaycanda uzun müalicədən sonra Ermənistan ordusunun əsgərindəki psixi gərginlik aradan qalxıb və bədənindəki qançırlar sağalıb”, - deyə mənbə qeyd edib.

Əsgər müraciətində Ermənistan ordusunun onlarla hərbçisinin Azərbaycan tərəfinə keçmək arzusunda olduğunu bildirib. “Ermənistan ordusunda korrupsiya və rüşvət vətənpərvərlik hissini heçə endirib. Orduda heç kimin sabaha ümidi yoxdur. Hər bir şəxs şərlənərək həbs edilmək, rüşvət vermək və ya döyülmək təhlükəsi ilə üz-üzədir. Zabitlərin əmək haqqının bir hissəsi yüksək komandirlər tərəfindən qanunsuz olaraq mənimsənilir. Hərbçilər belə ağır şəraitdə qulluq etməkdənsə, Azərbaycan tərəfinə keçməyə üstünlük verir”, - deyə əsgərin müraciətində deyilir.

Xatirladaq ki, Paruyr Simonyan Ermənistan ordusundakı özbaşınalıqlara etiraz olaraq ötən ilin mayında Azərbaycan tərəfinə keçib. ANS televiziyasına verdiyi müsahibədə də o, Ermənistana qayıtmaq istəmədiyini bəyan etmişdi./ANSPRESS/