Vəfa Zeynalova: "Açıq-saçıq filmlərə çəkiləcəyəm"

"Heç kim məni qınamasın..."

Klip: "AzDrama"nın aktrisası Vəfa Zeynalovanın həyatında ilk çəkildiyi "Xınalı yapıncaq" serialındakı Lamiyə obrazının xüsusi yeri var. Bu filmi özünün vizit kartı hesab edən aktrisa qeyd edir ki, tamaşaçılar ona hələ də Lamiyə deyə müraciət edirlər.
Bu günlərdə "Üç Nöqtə" qəzetinin qonağı olan aktrisa oxucuların ona ünvanladığı bir çox sualları cavablandırıb.
Aktrisaya ünvanlanan suallardan biri də belə olub: "İfa etdiyiniz rollar bir az açıq-saçıq olur. Bu, ailənizdə problem yaratmır ki?"
Vəfa zeynalova deyib: "Hansısa bir obrazla Vəfanı qatmaq olmaz. Mən aktrisayam, səhnədə başqalarının həyatını oynayıram. Səhnədən kənarda isə özüməm və unutmuram ki, mən hansısa kişinin qızıyam, kiminsə bacısıyam, kiminsə həyat yoldaşıyam, anayam və nəhayət, Azərbaycanda yaşayıram. Görürsünüz, buların hamısı məsuliyyətdir. Həmişə istəmişəm ki, insan birinci özünü, sonra ətrafını fikirləşsin. Amma məndə əksinə olur. İstər-istəməz ətrafı, ən sonda isə, özümü düşünürəm."

Aktrisanın fikrincə açıq-saçıq səhnələrə çəkilmək məsuliyyətdir və buna görə, çox böyük işlərini itirib.

"Çünki açıq-saçıq səhnələrə çəkilməkdən imtina etməyə məcbur olmuşam. Bu da mənim itkilərim olub. Amma sərhəddi keçməmək şərtilə açıq-saçıq filmlərə çəkiləcəyəm, heç kim məni qınamasın. Çünki mən Vəfa kimi küçədə çılpaq gəzmirəm, hansısa obrazı canlandırıram və onun həyatını tamaşaçıya göstərirəm. Çəkiliş meydanından çıxdıqdan sonra artıq özüm oluram. Təbii ki, həyat yoldaşım bu səhnələrə bir az qısqanclıqla yanaşır. Amma son anda razılaşır ki, bu, mənim sənətimdir."//282/