Erməni silahlı qüvvələri üç erməni əsgəri-Qrant Markosyan, Alik Tevosyan və Artur Sarkisyanın Azərbaycan tərəfinə keçdiyini təsdiqləyib. Qeyd edək ki, qurum, günorta saatlarınadək faktı təkzib edirdi. Bakı vaxtı ilə saat 13.55-də ermənilərin «Regnum» agentliyi məlumat yaymışdı ki, bu barədə məlumatlar Azərbaycan tərəfinin növbəti dezinformasiyasıdır. Lakin bundan bir qədər sonra erməni tərəfi öz təkzibini təkzib etmək məcburiyyətində qalıb. Belə ki, ANS televiziyası Azərbaycan tərəfinə keçmiş erməni əsgərlərin görüntülərini yayımladı və bundan sonra Erməni silahlı qüvvələri faktı təsdiqləmək məcburiyyətində qaldı. Qeyd edək ki, ötən gecə Ermənistan ordusunun 3 əsgəri Ağdamın «Ergi düzü» adlanan ərazisi istiqamətindən könüllü olaraq Azərbaycan tərəfinə keçib. Hərbi geyimdə olan əsgərlər «Ergi düzü»ndə hevandarlıqla məşğul olan Azərbaycanlı fermerlərin yaşadığı əraziyə yaxınlaşıb, qida və su istəyib. Heç bir müqavimət göstərməyən və könüllü olaraq silahsız surətdə Azərbaycan tərəfinə keçdiklərini etiraf edən erməni hərbçilərini yerli fermerlər telefon vasitəsi ilə lentə alıb. Kadrlardan da görünür ki, onların üçü də hərbi geyimdədir və sakit tərzdə yerli sakinlərin suallarına cavab verirlər. Erməni hərbçiləri Azərbaycan tərəfinə keçmələrinin səbəbini xəstə olmaları və hərbi hissədə onların müalicəsinə diqqət yetirilməməsi ilə izah ediblər. Sual-cavabdan aydın olur ki, erməni əsgərlərindən yalnız biri rus dilində danışa bilir və bütün suallara da o cavab verir. Digər 2 əsgər rus dilini bilmədiyini deyib. Sakinlər əsgərlərin erməni hərbçiləri olduğunu anlayandan sonra ərazidəki hərbi hissəyə məlumat verilib və onlar hərbi hissəyə aparılıb. Qeyd edək ki, hər üç əsgər Ermənistan ordusunda müddətli hərbi xidmətdə olub.
Maraqlıdır ki, Ermənistan tərəfidən faktın həm təkzibini, həm də təsdiqini eyni adam səsləndirib. Bu, erməni silahlı qüvvələrinin Azərbaycanın işğal olunmuş Dağlıq Qarabağ əarizsindəki nümayəndəsi Senor Asratyandır. O, əvvəlcə məlumatı dezinformasiya adlandırsa da, cəmi bir neçə saat sonra bunun tam əksini bəyan edib. Senor Asratyanın sözlərinə görə, üç ermə əsgəri qeyri-müəyyən səbəblərdən qoşunların təmas xəttindəki təhlükəsizlik zonasını keçiblər. /ANS PRESS/