ATV «ATB International» telekanalının yayım hüququnu aldı

Azərbaycanın Milli Teleradio Şurası (MTRŞ) bu gün «Azad Azərbaycan» teleradioyayım şirkətinin «ATB International» telekanalının birbaşa peyk yayımı üçün lisenziya verilməsi haqda müraciətinə baxıb.
Teleradioyayım haqqında qanunun 14.1, 29.2-ci maddələrinə və MTRŞ haqqında Qanunun 8.1-ci maddəsinə əsasən, Şura «Azad Azərbaycan» şirkətinə «ATB International» telekanalının birbaşa peyk yayımı üçün lisenziya verilməsi haqda qərar qəbul edib.
MTRŞ rəhbərinin müavini Toğrul Məmmədovun Turan agentliyinə verdiyi məlumata görə, lisenziya müsabiqədənkənar verilib, belə ki, yayım yerli tezliklərdə deyil, peyk vasitəsilə həyata keçiriləcək.
Məmmədov yayım dilləri haqda məsələ ilə bağlı şərh verməkdən yayınıb və qeyd edib ki, bu, teleşirkətin öz səlahiyyətindədir.
Öz növbəsində, teleşirkətdə təsdiq ediblər ki, «ATB International» rus, erməni, ingilis, türk və fars dillərində yayımlanmağı planlaşdırır.
«Azad Azərbaycan» teleşirkətində «ATB International» haqqında daha ətraflı məlumatın bir qədər sonra veriləcəyini bildiriblər.

«Azad Azərbaycan» kanalı haqqında:

Qeyd edək ki, «Azad Azərbaycan» teleradio şirkəti 2002-ci ildən fəaliyyət göstərir. Şirkətə ümummilli ATV telekanalı və 106 FM və 106.3 FM tezliklərində FM-radiostansiyalar daxildir.
Şirkətin rəsmi sahibləri haqda məlumat verilmir. Lakin şirkətə Tağı İbrahimov - Diaspora ilə İş üzrə Dövlət Komitəsinin rəhbəri Nazim İbrahimovun doğma qardaşı rəhbərlik edir.

Azərbaycanda xarici yayımın tarixi

Azərbaycanda xarici yayım ilk dəfə 1941-ci ildə Azərbaycan Dövlət radiosunda başlayıb- əvvəlcə fars, sonra isə türk dilində. 1959-cu ildə ərəb dilində yayım başlayır. 1961-ci ildən rus və erməni dillərində verilişlər yayımlanır.
1992-ci ilin noyabr ayında ingilis, alman, fransız, eləcə də Azərbaycanın etnik qruplarının dillərində - rus, erməni, ləzgi, talış, kürd, gürcü dillərində yayımlanan Beynəlxalq Azərbaycan Radiosu yaradılıb. 2007-ci ildə bu xidmət ləğv edilib. Hazırda yayım yalnız Azərbaycanın etnik qruplarının dillərində, həmçinin ərəb və türk dillərində həyata keçirilir.
Ölkə telekanalları arasında rus və ingilis dillərində xəbər proqramları AzTV və İctimai televiziyada yayımlanır.