Əcnəbilər niyə azərbaycanlı qızlarla evlənir?
"Avropa, Amerika qadınları feministləşib"
Azərbaycanda övladların ailə qurması ilə bağlı mentalitetdən irəli gələn bəlkə neqativ, bəlkə də pozitiv bir məqam var. Çox zaman ailələr öz övladlarını öz nəsillərindən, öz bölgə ya da zonalarına aid olan şəxslərlə ailə qurmasına üstünlük verirlər. Bəzi ailələr nəinki başqa millətlə, heç başqa rayona qız verib, oğul evləndirəni düzgün hesab etmirlər. Bütün bunlara baxmayaraq son 5 il ərzində MDB məkanında qarışıq nigahların sayı artıb. Artıq kişilərlə yanaşı, qızlar da əcnəbilərlə ailə həyatı qurur. Bu problemləri araşdıran "Təmiz dünya” cəmiyyətinin sədri Mehriban Zeynalovanın sözlərinə görə, əcnəbi vətəndaşların keçmiş ittifaq ölkələrindəki qadınlarla, ələlxüsusda azərbaycanlı qızlarla evlənməyə üstünlük verməsi Qərbdəki sosial problemlərlə əlaqədardır.
"Avropa, Amerika qadınları feministləşib və bu baxımdan sosial rollarında dəyişiklik baş verib. Feminist qadınlar kişilərin diqqət, qayğı göstərməsinə çox kobud cavab verirlər. Yaxud evdar, ailəcanlı deyillər”, deyə M. Zeynalova bildirir.
Qarışıq izdivacların bağlanmasında Azərbaycan qızları da maraqlıdır. Bunun da səbəbi onların sərbəst həyat tərzinə meylli olmasıdır. M. Zeynalova bununla qızların imkanlarının daha yaxşı olacağını düşündüyünü deyir.
Azərbaycan vətəndaşının əcnəbilərlə ailə qurması proseduruna gəldikdə isə bu, Nazirlər Kabinetinin 2002-ci ildə təsdiqlədiyi qanunla gerçkələşir. Qanuna görə, ailə qurmaq istəyən fərdlər Vətəndaş Vəziyyəti Aktları İdarəsinə subaylıq haqda arayışla müraciət etməlidir. Eyni zamanda təqdim olunan sənədlər arasında şəxsiyyətlərini təsdiq edəcək sənəd olmalıdır. Bununla yanaşı, 5 manat məbləğində rüsum ödənir.
Qeyd edək ki, əcnəbi şəxslə nigah yalnız Səadət sarayında reallaşdırılır.
Bəzən azərbaycanlı qızların əcnəbi vətəndaşla baş tutan evlilik həyatı arzuolunan şəkildə davam etmir. Mehriban Zeynalova bu növ ailələrin dağılmasında əsasən psixoloji amilin rol oynadığını qeyd edir.
"Burada əsasən müəyyən ənənə, din, etnik mənsubiyyətdən irəli gələn xüsusiyyətlər rol oynaya bilər. Bir çox hallarda qadınlar bunları nəzərə almadan ailə həyatı qururlar”.
Əcnəbiylə bağlanan nigahların pozulması ölkənin Ailə Məcəlləsinə görə müəyyənləşir. Nigahların pozulması zamanı himayələrində olan uşağın hansı tərəfə verilməsi isə Ali Məhkəmənin plenum qərarı ilə müəyyən olunur. Qərara görə, uşaq məktəbəqədər yaşdadırsa, azyaşlı uşağın ana nəvazişinə ehtiyacı olduğu üçün anaya verilir. Bu, məcburi qaydada olmur. Əgər valdeynlərin himayəsindəki uşaq məktəb yaşlıdırsa, burada tərəflərin razılaşması əsas götürülür. Təbii ki, bu prosesdə uşağın da fikri şərtdir.
Bundan başqa, cəmiyyət sədri azərbaycanlı kişilərin əcnəbi qadınlarla nigaha girməsinin səbəbini də izah edib. Onun fikrincə, kişilərin əcnəbi qadınlarla evlənməsi əsasən onların xarici ölkəyə getmək istəyi ilə bağlıdır. Burada iqtisadi -sosial problemlər də əsas rol oynayır
|
ILKIN
Məhəmmədəli
Ilqar
