Bu gün Türkiyədə parlament seçkiləri keçirilir. Bu seçkilər Türkiyədə növbəti 5 ildə hökumətə hansı partiyanın rəhbərlik edəcəyini müəyyənləşdirəcək. Aparılan rəy sorğuları isə hələlik onu göstərir ki, hakim Ədalət və İnkişaf Partiyası növbəti illərdə də hökumətə rəhbərliyi əldən verməyəcək.
Türkiyədə keçirilən seçkilərdə favorit hesab edilən partiyaların rəhbərləri də artıq səs verib. Liderlər səsvermənin gedişindən razılıqlarını bildiriblər. Türkiyənin keçmiş prezidenti Süleyman Dəmirəl seçkilərin gedişatı ilə bağlı konkret nəsə deməsə də, onların Türkiyənin həyatında xüsusi rol oynayacağına işarə edib. "Bu gün saat 24-də qədər bəyanat vermək olmaz. Amma mənim deyəcəyim bir şey var. Bu seçkilər millətimizə, ölkəmizə xeyirli olsun”.
Hazırki baş nazir Rəcəb Tayyib Ərdoğan isə bildirib ki, Türkiyə vətəndaşları bu gün iradəsini ortaya qoymaqla, qarşıdakı 4 il dövləti kimin idarə edəcəyini qərarını vermiş olacaq. "Təbii ki, bu bizim üçün ən vacib qərar olacaq, hörmət olunan bir qərar olacaq. İndiyədək mənə verilən məlumata görə, çox yaxşı seçki prosesi davam edir”, - deyə o vurğulayıb.
CHP lideri Kemal Kılıçdaroğlu da xalqın qərarına hörmətlə yanaşmağın vacibliyini önə çəkib. Uzun bir prosesin sonuna gəlindiyini deyən partiya lideri qeyd edib ki, bu gün xalqın qərar günüdür: "Gözəl və demokratik keçir seçkilərimiz. Hesab edirəm ki, demokratiyanı və azadlığı bu ölkəyə gətirmək üçün cəhdlərimiz nəticəni verər”.
Millətçilərin lideri Dövlət Baxçalı isə 24-cü çağırış parlament seçkilərin böyük türk millətinə, bütün siyasi partiyalara və onların üzvlərinə xeyirli olmasını Allahdan arzulayıb: "Bütün siyasi partiyalarımız seçki dövründə əllərindən gələni edib. Düşüncələrimizi xalqımıza çatdırmaq üçün cəhdlər etmişik. Artıq qərar millətimizindir”. |
Leman
ilkin
XEBERDI
Məhəmmədəli
