Yaponiyanın "Fukusima-1” atom elektrik stansiyasından 30 km aralı məsafədə radiasiyanın gündəlik miqdarı radiasiyanın təbiətdəki illik normasından da artıq olub. ANS PRESS-in "Kyodo News”a istinadən verdiyi xəbərə görə, bu barədə Yaponiyanın Elm Nazirliyi açıqlama verib.

Bundan başqa, məlum olub ki, radiasiyanın həcminin qəfildən sürətlə artması fonunda "Fukusima-1” AES-nin işçi heyəti stansiyanın birinci və ikinci enerji bloklarında işi dayandırıblar. "Tokyo Electric Power Co.” energetika şirkətinin operatoru radiasiyanın həcminin belə qəfil artmasının səbəbini reaktorun aşağı hissəsində gölməçənin yığılıb qalması ilə izah edir.

"RBK” isə xəbər verir ki, radioaktiv su üçüncü enerji blokuna da yığılıb, amma hələlik stansiyanın əməkdaşları oradan evakuasiya olunmayıb.

Avstriyalı tədqiqatçı Qerhard Votavanın araşdırma zamanı əldə etdiyi müqayisəli nəticələri açıqlayıb. Belə ki, Yaponiyanın"Fukusima-1” AES-də radioaktiv elementlərin tullantılarının ilk 4 gündəki göstəriciləri, 1986-cı ildə Çernobıl atom elektrik stansiyasında baş verən qəzanın analoji göstərinin 50%-ni təşkil edir. Amma Fransanın Radiasiyadan müdafiə və nüvə təhlükəsizliyi İnstitutunun ekspertləri isə hesab edir ki, bu göstərici 50 yox, 10 faizdir.

Fukusima əyalətindəki suyun monitorinqi zamanı məlum olub ki, sudakı yodun radioaktivliyinin qatılığı normadan 147 dəfə artıqdır.

Xatırladaq ki, martın 11-də Yaponiyada baş verən zəlzələ Fukusima əyalətində yerləşən "Fukusima-1” AES-də qəzanın baş verməsinə səbəb olub. Nəticədə isə regionda radiasiya sürətlə yayılmağa başlayır.